睇咗我个砖栏咁耐，大家都知道我Happy Mama唔係典型怪兽家长啦，虽则我对住两只马骝做功课时，都成日讲「唔使急，ABC紧要快！」，但比较起学业，我更关心佢哋将来会唔会成为一个正直、有良好价值观嘅人。每次电视或者报纸杂誌有一啲关于落后、贫穷嘅消息时，我同Happy Papa都会同佢哋讨论，讲畀佢哋知道「我哋几咁幸福」，希望佢哋知道世界上好多人需要别人帮助。所以当Happy Mama知道乐施会今年12月搞教师尼泊尔考察团，我就一定要大力宣传。

点解？因为除咗父母之外，老师亦係小朋友望向世界嘅窗口，影响力非常大，好似乐施会教育经理苏培健（Stanley）话﹕「搞呢个考察团，希望老师们在情感上有一个『肉紧』嘅感受，亲身睇吓当地嘅发展项目，而唔係只是流于书本上的认知，将世界公民的议题带返去畀同学。」

今次尼泊尔之行，乐施会将安排老师参观当地农村生计嘅项目、探访公平贸易产品嘅生产者，甚至会到一啲曾经发生过灾难嘅地区，考察灾后重建状况，等老师们真正接触到当地居民，了解到贫穷问题嘅源头同成因。「老师经亲身探访后，就可以更立体咁传递畀学生知道。」

将贫穷公平议题带畀同学

世界咁大，除咗睇东方昇嘅（Sorry係方东昇至啱）《世界零距离》增广见闻，我哋都应该更加留意和关心全球其他嘅问题。为人师表嘅你，Happy Mama衷心希望你哋有时间嘅可以参加呢个活动；而做父母嘅就要身体力行，带孩子多做义工，培养他们成为关心社会嘅世界公民。

考察日期﹕12月

费用﹕4500港元

对象﹕拥有8年经验或以下的中学教师

截止报名日期﹕10月23日（本周五）

报名及详情﹕goo.gl/kuKdP2